Topic: 'Dil'


Contributed by Sandeep Nain

dil hii to hai na sang-o-Khisht dard se bhar na aaye kyon
royenge ham hazaar baar koii hamen sataaye kyon
[Mirza Ghalib]

dil-e-naadaaN tujhe huaa kyaa hai
aaKhir is dard  kii davaa kyaa hai
[Mirza Ghalib]

dil kii haqiiqat arsh kii azamat sab kuchh hai maaluum hamen
sair rahii hai aksar apanii in paakiizaa makaanon men
[Mir Taqi Mir]

mere dil men tuu hii tuu hai dil kii davaa kyaa karuuN
dil bhii tuu hai jaaN bhii tuu hai tujhape fidaa kyaa karuuN
[Unknown]

bahatar to hai yahii ke na duniyaa se dil lage
par kyaa karen jo kaam na be-dillagii chale
[Zauq]

phirate huye kisii kii nazar dekhate rahe
dil Khuun ho rahaa thaa magar dekhate rahe 
[Asar Lucknawi] 

ab kyaa bataauuN main tere milane se kyaa milaa
irfaan-e-Gam huaa mujhe dil kaa pataa milaa
[Seemab Akbarabadi]

dekh to dil ke jaaN se uThataa hai 
ye dhuaaN saa kahaaN se uThataa hai
[Meer Taqi Meer]


Contributed by Abhay Ghaisas:

kisii ko de ke dil koii navaa sanj-e-fuGaaN kyon ho
na ho jab dil hii siine men to phir muuNh men zabaaN kyon ho
[Ghalib]

jalaa hai jism jahaan dil bhii jal gayaa hogaa
kuredate ho ab raakh justajuu kyaa hai
[Ghalib]

koii mere dil se puuchhe tere tiire niimakash ko
ye Khalish kahaan se hotii jo jigar ke paar hotaa
[Ghalib]

haan vo nahiin Khudaaparast, jaao vo bevafaa sahii
jis ko ho diin-o-dil aziiz usakii galii men jaae kyon
[Ghalib]

dil se Khayaal-e-yaar ko Taale huye to hain 
ham jaan de ke dil ko sambhaale hue to hain 
[Fani Badayuni] 

kisii ke jaur-o-sitam kaa to ik bahaanaa thaa 
hamaare dil ko bahar-haal TuuT jaanaa thaa 
[Naresh Kumar Shad] 

rahate the kabhii jinake dil men ham jaan se bhii pyaaron kii tarah 
baiThe hain unhiin ke kuuche men ham aaj gunahagaaron kii tarah 
[Majrooh Sultanapuri] 

isakaa ronaa nahiin, kyon tumane kiyaa dil barbaad 
isakaa Gam hai ki bahut der men barbaad kiyaa 
[Josh Malihabadi] 

ek din kah liijiye jo kuchh hai dil men aapake 
ek din sun liijiye jo kuchh hamaare dil men hai 
[Josh Malihabadi] 

le gayaa chhiin ke kaun aaj teraa sabr-o-qaraar 
beqaraarii tujhe ai dil kabhii aisii to n thii 
[Bahadurshah Zafar] 

dil kaa kyaa ho gayaa, Khudaa jaane 
kyon hai aisaa udaas kyaa jaane 
[Daag Delhavi] 

dil le ke muft, kahate hain kuchh kaam kaa nahiin 
ulTii shikaayaten huiin, ehasaan to gayaa 
[Daag Delhavi] 

dil men ab yuun tere bhuule hue Gam aate hain 
jaise bichhaDe hue qaabe men sanam aate hain 
[Faiz Ahmed Faiz] 

koii aahaT koii aavaaz koii chaap nahiin 
dil kii galiyaan baDii sunasaan hai aae koii 
[Parvin Shakir] 

dil naaumiid to nahiin naakaam hii to hai 
lambii hai Gam kii shaam magar shaam hii to hai 
[Faiz Ahmed Faiz] 

Axact

Axact

Vestibulum bibendum felis sit amet dolor auctor molestie. In dignissim eget nibh id dapibus. Fusce et suscipit orci. Aliquam sit amet urna lorem. Duis eu imperdiet nunc, non imperdiet libero.

Post A Comment:

0 comments: