Aaye kuch Abr kuch sharab Aaye

0
6

Aaye kuchh abr kuchh sharaab aaye
Us ke baad aaye jo azaab aaye

[azaab=trouble, difficulty]

Baam-e-miinaa se maahataab utare
Dast-e-saaqii men aaftaab aaye

Har rag-e-khuun men phir charaagaan ho
Saamane phir wo benaqaab aaye

Umr ke har waraq pe dil ko nazar
Terii meher-o-wafaa ke baab aaye

Kar rahaa thaa gam-e-jahaan kaa hisaab
Aaj tum yaad behisaab aaye

Na gaii tere gam kii saradaarii
Dil men yuun roz inqalaab aaye

Jal uthe bazm-e-gair ke dar-o-baam
Jab bhii ham khaanamaan_kharaab aaye

Is tarah apanii khamashii guunjii
Goyaa har simt se jawaab aaye

‘Faiz’ thii raah sar basar manzil
Ham jahaan pahunche kaamayaab aaye

LEAVE A REPLY

Please enter your comment!
Please enter your name here