Bewafa / Bewafaai Urdu Poetry

0
12
Topic : Bewafa / Bewafaai
Har ek se kahate hain ke “Daag” bewafaa nikalaa
Ye poochhe in se koii wo Gulaam kis kaa thaa
[Daag Dehlvi]
Tum bhi majaboor ho hum bhi majaboor hain
Be-wafaa kaun hai baa-wafaa kaun hai
[Bashir Badr]
Har kisii se maangate hain ye wafaaon kaa saboot
Bewafaa jab se wafaadaaron ke maalik ho gaye
[Manzar Bhopali]
[saboot = proof]
Ham se sharmaataa hai aaiinaa muqaabil aakar
Bewafaa hain na munaafiq na adaakaar hain ham
[Manzar Bhopali]
[muqaabil aanaa = to confront/come face to face with]
[munaafiq = hypocrite/infidel; adaakaar = actor]
Bagair us bewafaa se jee lagaaye
Jo sach poochho to dil kis kaa lage hai
[Kaleem Aajiz]
Insaan apane aap men majaboor hai bahut
Koii nahiin hai bewafaa afsos mat karo
[Bashir Badr]
Aisaa bhii nahiin ke wo laut kar na aayegaa
Bewafaa wo sahii par itanaa bhii nahiin
[Zor Dakkani]
Bewafaaii kaa ab gilaa kaisaa
Aap pahale bhii kab hamaare the
Merii aankhon men phailate hue rang
Kal talak aap ko bhii pyaare the
[Unknown]
[gilaa = complaint; kal talak = till yesterday (in the past)]
Hamen bhii doston se kaam aa paraa yaanii
Hamaare doston ke bewafaa hone kaa waqt aayaa
[Harichand Akhtar]
Haan wo nahiin Khudaaparast, jaao wo bewafaa sahii
Jis ko ho deen-o-dil azeez us kii galii men jaaye kyoon
[Mirza Ghalib]
[parast = worshipper; deen = religion; azeez = dear]
Phir usii bewafaa pe marate hain
Phir wahii zindagii hamaarii hai
[Mirza Ghalib]
Barase bagair hii jo ghataa ghir ke khul gaii
Ek bewafaa kaa ahad-e-wafaa yaad aa gayaa
[Khumar Barabankvi]
[ahad = promise]
Bewafaa tum kabhii na the lekin
Ye bhii sach hai ki bewafaa-se rahe
[Javed Akhtar]
Ye adaa-e-beniyaazii tujhe bewafaa mubaarak
Magar aisii berukhii kyaa ki salaam tak na pahunche
[Shakeel Badayuni]
Ham baawafaa the is liye nazaron se gir gaye
Shaayad tumhen talaash kisii bewafaa kii thii
[Unknown]
Nahiin shikawaa mujhe kuchh bewafaaii kaa terii hargiz
Gilaa tab ho agar tuune kisii se bhii nibhaaii ho
[Khwaja Meer Dard]

Wafaa tujh se ai bewafaa chaahataa hoon
Merii saadagii dekh kyaa chaahataa hoon
[Hasrat Mohani]
Gam to ye hai ki wo ahad-e-wafaa toot gayaa
Bewafaa koii bhii ho tum na sahii ham hii sahii
[Rahi Masoom Raza]
Note: The above sher also appears as
Gam to is kaa hai ki wo ahad-e-wafaa toot gayaa
Bewafaa koii bhii ho tum na sahii, ham hii sahii
[Rahi Masoom Raza]
Aashiqii men bahut zaroorii hai
Bewafaaii kabhii kabhii kar lii
[Bashir Badr]
Mare jaate hain terii bewafaaii dekhane waale
Chiraag-e-subah hai shaam-e-judaaii dekhane waale
[Daag Dehlwi]
“Daag” kyoon tum ko bewafaa kahataa
Wo shikaayat kaa aadamii hii nahiin
[Daag Dehlwi]
Terii bewafaaiyon pe terii kajadaaiyon pe
Kabhii sar jhukaa ke roye kabhii moonh chhupaa ke roye
[Saifuddin Soz]
Khud apane aap ko parakhaa to ye nadaamat hai
Ke ab kabhii use ilzaam-e-bewafaaii na doon
[Ahmed Faraz]
[nadaamat = shame]
Aa ke ab tasleem kar len tuu nahiin to main sahii
Kaun maanegaa ke ham men bewafaa koii nahiin
[Ahmed Faraz]
Aafaton men jaan-o-dil kaa Daalanaa bekaar hai
Bewafaa se dil lagaakar kyaa koii phal paaye hai
[Jurrat]
Aap ko bhool jaayen ham itane to bewafaa nahiin
Aap se kyaa gilaa karen aap se kuchh gilaa nahiin
[Tasleem Fazli]
Ab na deeje zafar kisii ko dil
Ki jise dekhaa, bewafaa dekhaa
[Bahadur Shah Zafar]
Barii zaalim nihaayat bewafaa hai
Ye duniyaa phir bhii kitanii Khushnumaa hai
[Naresh Kumar Shad]
Bewafaa bhii ho sitamagar bhii jafaa peshaa bhii
Ham Khudaa tum ko banaa lenge tum aao to sahii
[Mumtaz Mirza]
Bewafaa likhate hain wo apanii kalam se mujh ko
Ye wo qismat kaa likhaa hai jo mitaa bhii na sakoon
[Ameer Minai]
Bewafaa to na wo the na ham
Yoon huaa bas judaa ho gaye
[Nida Fazli]
Bewafaa tuune mujhe pyaar kiyaa hii kyoon thaa
Sirf do-chaar sawaalaat kaa mauqaa de de
[Qaiser ul Jafri]
Dil liyaa jis ne bewafaaii kii
Rasm hai kyaa ye dilrubaaii kii
[Shefta]
Door se thaa wo kaii cheharon men paas se koii bhii waisaa na lagaa
Bewafaaii bhii usii kaa thaa chalan phir kisii se hii shikaayat na huii
[Nida Fazli]
Ham aksar doston kii bewafaaii sah to lete hain
Magar ham jaanate hain dil hamaare toot jaate hain
[Roshan Nanda]
Ho jis adaa se mere saath bewafaaii kar
Ke tere baad mujhe koii bewafaa na lage
[Qaiser ul Jafri]
Is men kuchh un kii jafaayen bhii to shaamil hain shamiim
Bewafaaii kii jo tohamat mere sar aaii hai
[Shamim Jaipuri]
Is puraanii bewafaa duniyaa kaa ronaa kab talak
Aaiiye mil jul ke ik duniyaa naii paidaa karen
[Nazeer Banarasi]
Is qadar musalsal thiin shiddaten judaaii kii
Aaj pahalii baar main ne us se bewafaaii kii
[Ahmed Faraz]
Is se pahale ke bewafaa ho jaayen
Kyon na ai dost ham judaa ho jaayen
[Ahmed Faraz]
Is se pahale ki saadagii terii lab-e-Khaamosh ko gilaa kah de
Terii majabooriyaan na dekh sake aur dil tujh ko bewafaa kah de
[Saifuddin Saif]
Jab mere saare charaag-e-tamannaa hawaa ke hain
Jab mere saare Khwaab kisii bewafaa ke hain
[Jaun Eliya]
Jee men aataa hai ke us shokh-e-tagaaful kesh se
Ab na miliye phir kabhii aur bewafaa ho jaaiye
[Hasrat Mohani]
Jis ko sab be-wafaa samajhate hon
Bewafaaii usii se mushkil hai
[Ahmed Faraz]
Jo ye daur bewafaa hai tera Gam to mustaqil ho
Wo hayaat-e-aashiqii kyaa jo dawaam tak na pahunche
[Yahya Jasdanwalla]
Kaam aa sakiin na apanii wafaayen to kyaa karen
Ik bewafaa ko bhool na jaayen to kyaa karen
[Akhtar Sheerani]
Kabhoo jaayegii udhar sabaa to ye kahiyo us se ki bewafaa
Magar ek meer-e-shikastaa-paa tere baag-e-taazaa men Khaar thaa
[Meer Taqi Meer]
Kisii bewafaa kii Khaatir ye junoon faraaz kab tak
Jo tumhen bhulaa chukaa hai use tum bhii bhool jaao
[Ahmed Faraz]
Main chaahataa bhii yahii thaa wo bewafaa nikale
Use samajhane kaa koii to silsilaa nikale
[Wasim Barelwi]
Mujhe mere mitane kaa Gam hai to ye hai
Tumhen bewafaa kah rahaa hai zamaanaa
[Qamar Jalalwi]
Na jaane kyaa hai us kii bebaak aankhon men
Wo moonh chhupaa ke jaaye bhii to bewafaa lage
[Qaiser ul Jafri]
Naqsh-e-deewaar kyoon na ho aashiq
Hairatafazaa hai bewafaa kii adaa
[Wali Deccani]
Paayiye kis jagah bataa aye but-e-bewafaa tujhe
Umr-e-guzashtaa kii tarah gum hii sadaa suraag hai
[Khwaja Mir Dard]
Payaam aaye hain us yaar-e-bewafaa ke mujhe
Jise qaraar na aayaa kahiin bhulaa ke mujhe
[Ahmed Faraz]
Phir usii bewafaa pe marate hain
Phir wahii zindagii hamaarii hai
[Mirza Ghalib]
Raat sapanaa bahaar kaa dekhaa din huaa to Gubaar saa dekhaa
Bewafaa waqt bezubaan nikalaa bezubaanii ko naam kyaa de ham
[Sudarshan Faakir]
Saare duniyaa kii nazar men hai meraa ahad-e-wafaa
Ek tere kahane se kyaa main bewafaa ho jaaoongaa
[Wasim Barelwi]
Sad afasos jaatii rahii vasl kii shab
Zaraa Thahar ai bewafaa kahate kahate
[Momin Khan Momin]
Sar jukaaoge to patthar dewataa ho jaayegaa
Itanaa mat chaaho use wi bewafaa ho jaayegaa
[Bashir Badr]
Shehar-e-wafaa men ab kise ahal-e-wafaa kahen
Ham se gale milaa to wo hii bewafaa milaa
[Ayaz Jhanswi]
Terii bewafaaiiyon par, terii kajadaaiiyon par
Kabhii sar jhukaa ke roye, kabhii moonh chhupaa ke roye
[Saifuddin Saif]
Tum se kyaa kahen, kitane Gam sahe
Ham ne be-wafaa tere pyaar men
[Fana Nizami Kanpuri]
Tuu bewafaa hai magar mujh ko jaan se pyaaraa hai
Isii adaa ne to raahii ko teraa Gulaam kiyaa
[Saeed Rahi]
Tuu bewafaa tuu maharbaan ham aur tujh se badgumaan
Ham ne to poochhaa thaa zaraa ye waqt kyoon Thaharaa teraa
[Ibn-e-Insha]
Uth ke ik bewafaa ne de dii jaan
Rah gaye saare baawafaa baithe
[Khumar Barabankwi]
Us bewafaa kaa shahar hai aur ham hain dosto
Ashk-e-rawaan kii nahar hai aur ham hain dosto
[Munir Niazi]
Us udoo-e-jaan ko amajad main buraa kaise kahoon
Jab bhii aayaa saamane wo bewafaa achchhaa lagaa
[Amjad Islam Amjad]
Wo charaag-e-jaan kabhii jis kii lau, na kisii hawaa se nigoon huii
Terii bewafaaii ke waasawaa use chup ke chup ke bujhaa gaye
[Amjad Islam Amjad]
Ye jaan tum na loge agar aap jaayegii
Is bewafaa kii Khair kahaan tak manaayen ham
[daag Dehlvi]
Zindagii ke udaas lamhon men
Bewafaa dost yaad aate hain
[Unknown]
Un kii bewafaaii se hamen koii shikwaa to nahiin
Gilaa to apane aap se hai jo un ke qaabil na the
[Unknown]

LEAVE A REPLY

Please enter your comment!
Please enter your name here