Bosaa / Kiss Urdu Poetry

0
12
Topic : Bosaa / Kiss

Ghair len mehfil men bose jaam ke
Ham rahen yoon tashnaalab paighaam ke
[Mirza Ghalib]

[tashnaalab = thirsty]

Bosaa dete nahiin aur dil pe hai har lehjaa nigaah
Jii men kahate hain muft aaye to maal achchhaa hai
[Mirza Ghalib]

Sohbat men Ghair kii na padii ho kahiin ye Khoo
Dene lagaa hai bosaa baghair iltijaa kiye
[Mirza Ghalib]

[soabat = company; Khoo = habit; iltijaa = pleading]

Dikhaake jumbish-e-lab hii tamaam kar ham ko
Na de jo bosaa to moonh se kahiin jawaab to de
[Mirza Ghalib]

[jumbish = movement]

Kyaa Khoob tum ne Ghair ko bosaa nahiin diyaa
Bas chup raho hamaare bhii moonh men zabaan hai
[Mirza Ghalib]

Bosaa kaisaa ye hii Ghaneemat hai
Ke na samajhe vo lazzat-e-dushnaam
[Mirza Ghalib]

[Ghaneemat = blessing; lazzat = deliciousness; dushnaam = abuse]

Aankhen merii talvon se mal jaaye to achchhaa
Hai hasrat-e-paa-bos nikal jaaye to achchhaa
[Zauq]

Jaan kar sotaa tujhe wo qasaa-e-paabosii meraa
Aur teraa Thukaraa ke sar ko muskuraanaa yaad hai
[Hasrat Mohani]

Yaar thaa gulzaar thaa baad-e-sabaa thii main na thaa
Laayaq-e-paabos-e-jaan kyaa hinaa thii main na thaa
[Bahadur Shah Zafar]

Karate ho mujh ko manaa-e-qadambos kis liye
Kyaa aasmaan ke bhii baraabar nahiin hoon main
[Mirza Ghalib]

Kahiin bose kii mat jurrat dilaa! Kar baithiyo un se
Abhii is had ko vo kaifii nahiin hoshiyaar baithe hain
[Insha]

[jurrat = boldness; dilaa = O heart]




Bose kii hai to Khwaahish par kahiye kyon ke us se
Jis se mizaaj-e-lab par harf-e-sawaal baandhe
[Mirza Sauda]

Kyaa taab kyaa majaal hamaarii ki bosaa len
Lab ko tumhaare lab se milaakar kahe baghair
[Bahadur Shah Zafar]

Bosaa jo rukh kaa nahiin dete lab kaa diijiye
Hai ye misl-e-phool nahiin pankhadii sahii
[Zauq]

Saadagii dekh ki bose kii havas rakhataa hoon
Jin labon se ki mayassar nahiin dushnaam mujhe
[Mussafi]

Koii moonh choom legaa is nahiin par
Shikan rah jaayegii yoon hii jabiin par
[Riaz Khairabadi]

Shaq un ko thaa ki raat men bosaa na le koii
Gaalon pe rakh ke soye kalaaii tamaam raat
[Unknown]

Le lo bosaa apanaa waapas kis liye takaraar kii
Kyaa koii jaagiir ham ne chhiin lii sarakaar kii
[Akbar Meeruti]

Dhamakaa ke bosaa loongaa rukh-e-rashk-e-maah kaa
Chandaa wasool hotaa hai saahab dabaav se
[Akbar Allahabadi]

Aaj bose un ke gin gin ke liye
Din gine jaate the is din ke liye
[Qavi Amrohi]

Bosaa dene men jo poochhaa ki bigadataa kyaa hai
Bole lene men kaho aap ko milataa kyaa hai
[Unknown]

Bosaa jo talab main ne kiyaa hans ke vo bole
Ye husn kii daulat hai lutaaii nahiin jaatii
[Unknown]

Lipataa jo bosaa leke to bole ki dekhiye
Ye doosarii Khataa hai wo pehlaa qusoor thaa
[Unknown]

Ek bose ke talab-gaar hain ham
Aur maange to gunah-gaar hain ham
[Zar Azeemabadi]

Kand-e-lab kaa un ke bosaa be-taqalluf le liyaa
Gaaliyaan khaaiin balaa se moonh to miithaa ho gayaa
[Maftoon Dehlvi]

LEAVE A REPLY

Please enter your comment!
Please enter your name here