Topic : Khat / Letter


Khat likheNge garche matlab kuchh na ho
ham to aashiq haiN tumhaare naam ke
[Mirza Ghalib]

magar likhavaaye koii us ko Khat to ham se likhavaaye
huii subah aur ghar se kaan par rakh kar qalam nikale
[Mirza Ghalib]

Gair phirataa hai liye yooN tere Khat ko ki agar
koii poochhe ki ye kyaa hai to chhupaaye na bane
[Mirza Ghalib]

deke Khat mooNh dekhataa hai naamaabar
kuchh to paiGaam-e-zubaanii aur hai
[Mirza Ghalib]

Galat na thaa hameN Khat par gumaaN tasallii kaa
na maane deedaa-e-deedaar joo to kyoNkar ho
[Mirza Ghalib]

ho liye kyoN naamaabar ke saath saath
yaa rab apane Khat ko ham pahoNchaayeN kyaa
[Mirza Ghalib]

qaasid ke aate aate Khat ik aur likh rakhooN
maiN jaanataa hooN jo wo likheNge jawaab meN
[Mirza Ghalib]

tere Khushboo meN base Khat maiN jalaataa kaise
pyaar meN Doobe hue Khat maiN jalaataa kaise
tere haathoN ke likhe Khat maiN jalaataa kaise
tere Khat aaj maiN gangaa meN bahaa aayaa hooN
aag bahate hue paanii meN lagaa aayaa hooN
[Rajendranath Rahbaar]

wo Khat ke purze uRaa rahaa thaa
hawaaoN kaa ruKh dikhaa rahaa thaa
[Gulzar]

husn thaa teraa bahut aalam fareb
Khat ke aane par bhii ik aalam rahaa
[Meer Taqi Meer]

tumhaare Khat meN nayaa ik salaam kis kaa thaa
na thaa raqiib to aaKhir wo naam kis kaa thaa

hamaare Khat ke to purze kiye paRhaa bhii nahiiN
sunaa jo tum ne baadil wo payaam kis kaa thaa
[Daag Dehlvi]

ho chukaa aish kaa jalsaa to mujhe Khat bhejaa
aap kii tarah se mehamaan bulaaye koii
[Daag Dehlvi]

paRh ke teraa Khat mere dil kii ajab haalat huii
iztaraab-e-shauq ne ek hashr barapaa kar diyaa
[Hasrat Mohani]

merii shaam-e-Gam ko wo bahalaa rahe haiN
likhaa hai ye Khat meN ki ham aa rahe haiN
[Akhtar Shirani]

Khat likh ke kabhii aur kabhii Khat ko jalaa kar
tanhaaii ko rangiin banaa kyoN nahiiN lete
[Zafar Gorakhapuri]

kaise maane ke unheN bhool gayaa too ai kaif
un ke Khat aaj hameN tere sarhaane se mile
[Kaif Bhopali]

raaz kii baateN likhii aur Khat khulaa rahane diyaa
jaane kyoN rusvaaiioN kaa silsilaa rahane diyaa
[Sabir Jalalabadi]

wo bhii shaayad ro paRe veeraan kaaGaz dekh kar
maiN ne use aaKhirii Khat meN likhaa kuchh bhii nahiiN
[Zahur Nazar]

Khat diijiyo chhupaa ke mile wo agar kahiiN
lenaa na mere naam ko ai naamaabar kahiiN
[Mashraf Ali Khan "Fugaan"]



deN bhii jawaab Khat ki na de kyaa Khabar mujhe
kyoN apane saath le na gayaa naamaabar mujhe
[Safi Lakhanavi]

likho salaam Gair ke Khat meN Gulaam ko
bande kaa bas salaam hai aise salaam ko
[Momin]

likhaa wahii thaa ki jo thaa naseeb kaa likkhaa
balaa se, Khat kaa jawaab us ne kuchh diyaa to sahii
[Qabil Dehlvi]

Khat to bhejaa hai par ab Khauf yahii hai dil meN
maiN ne kyaa us ko likhaa aur wo kyaa samajhegaa
[Majnu Azimabadi]

donoN kaa ek haal hai ye muddaaa ho kaash
wo hii Khat us ne bhej diyaa kyoN jawaab meN
[Momin]

waaN se aayaa hai jawaab-e-Khat koii suniyo to zaraa
maiN nahiiN hooN aap meN mujh se na samajhaa jaayegaa
[Jurrat]

Gair ke dhoke meN Khat le ke meraa qaasid se
paRhane ko paRh to liyaa naam magar chhoR diyaa
[Nizam Rampuri]

miT chale merii umeedoN kii tarah harf magar
aaj tak tere KhatoN se terii Khushboo na gaii
[Akhtar Sheerani]

ek muddat se na qaasid hai na Khat hai na payaam
apane waade ko too kar yaad mujhe yaad na kar
[Jaleel Manikpuri]

Khat ke purze aaye haiN qaasid kaa sar tasveer-e-Gair
ye hai bhejaa us sitamgar ne mere Khat kaa jawaab
[Unknown]

purza uRaa ke Khat ke ye ek purzaa likh diyaa
lo apane ek Khat ke ye sau Khat jawaab meN
[Bismil Dehlvi]

allaah re fareb-e-tamannaa ki baarahaa
apane hii Khat ko le ke paRhaa naamaabar se aap
[Ummid Amethawi]

kisii ko bhej ke Khat haaye ye kaisaa azaab aayaa
ki har ek poochhataa hai naamaabar aayaa, jawaab aayaa
[Ehsan Marharwi]

likh chuke ham jaa chukaa Khat gar yahii haalat rahii
haath meN aayaa qalam aur shauq kaa daftar khulaa
[Fani Badayuni]

kyaa jaane likh diyaa kyaa use iztiraab meN
qaasid kii laash aaii hai Khat ke jawaab meN
[Momin Khan Momin]

siyaahii aaNkh se le kar ye naamaa tum ko likhataa hooN
ki tum naamaa ko dekho aur tumheN dekhen merii aaNkheN
[Unknown]

meraa Khat paRh ke bole naamaabar se jaa Khudaa haafiz
jawaab aayaa merii qismat se lekin laajawaab aayaa
[Shakeel Badayuni]

ab waham kaa ilaaj ke Khat deke un ke naam
aage chale haiN chaar qadam naamaabar se ham
[Rasaa Rampuri]

ho sake to jawaab de denaa
ye muhabbat kaa aaKhirii Khat hai
[Sanam Pratapgadhi]

ham ne maanaa ki nahiiN hotii muqammal taskeen
Khat ko bhii aadhii mulaaqaat kahaa jaataa hai
[Taabish Lucknawi]

jis par hamaarii aaNkh ne motii bichhaye raat bhar
bhejaa vohii kaaGaz use ham ne likhaa kuchh bhii nahiiN
[Bashir Badr]

qayaamat hai ye kah ke us ne lauTaayaa hai qaasid ko
ki un kaa to har ek Khat aaKhirii paiGaam hotaa hai
[Sheri Bhopali]

kyaa kyaa fareb dil ko diye iztiraab meN
un kii taraf se aap likhe Khat jawaab meN
[Daag Dehlvi]

naamaabar tuu hii bataa tuu ne to dekhe hoNge
kaise hote haiN wo Khat jin kaa jawaab aataa hai
[Qamar]

Khat Gair kaa paRhate the jo tokaa to wo bole
aKhbaar kaa parchaa hai Khabar dekh rahe haiN
[Daag Dehlvi]

tawaqqo hai dhoke meN aakar wo paRh leN
ki likkhaa hai naamaa unheN Khat badal kar
[Ameer Minai]

leke Khat un kaa kiyaa zabt bahut kuchh lekin
thar-tharaate hue haathoN ne bharam khol diyaa
[Jigar Moradabadi]

meraa Khat us ne paRhaa paRh ke naamaabar se kahaa
yahii jawaab hai is Khat kaa koii jawaab nahiiN
[Ameer Minai]

aap kaa Khat nahiiN milaa mujh ko
daulat-e-jahaaN milii mujh ko
[Aseer Lucknawi]

Axact

Axact

Vestibulum bibendum felis sit amet dolor auctor molestie. In dignissim eget nibh id dapibus. Fusce et suscipit orci. Aliquam sit amet urna lorem. Duis eu imperdiet nunc, non imperdiet libero.

Post A Comment:

0 comments: