Naseh Urdu Poetry

0
22

Topic : Naseh

Ye kahaan kii dostii hai ke bane hain dost naaseh
Koii chaaraasaaz hotaa koii Gamgusaar hotaa
[Mirza Ghalib]

Naaseh ko bulaao meraa imaan sambhaale
Phir dekh liyaa us ne sharaarat kii nazar se
[Hafeez Jallandhari]

Karanaa hai aaj hazrat-e-naaseh se saamanaa
Mil jaaye do gharii ko tumhaarii nazar mujhe
[Jigar Moradabadi]

Naasehaa dekh naasehaa ab tuu bahut sataa chukaa
Door ho mere paas se tujh par abhii parii nahiin
[Khumar Barabankvi]

Dillagii dillagii nahiin naaseh
Tere dil ko abhii lagii hii nahiin
[Daag Dehlvi]

Samajh ke aur hii kuchh mar chalaa main ai naaseh
Kahaa jo tuu ne nahiin jaan jaa ke aane kii
[Momin]

Huii hai hazrat-e-naaseh se guftagoo jis shab
Wo shab zaroor sar-e-koo-e-yaar guzarii hai
[Faiz]

Naam us kaa to mere dil men nihaan thaa naaseh
Haaye kambakht tere moonh se ye kyon kar nikalaa
[Daag Dehlvi]

Ab to har shaam guzaratii hai isii kooche men
Ye nateejaa huaa naaseh tere samajhaane kaa
[Iqbal Sufipuri]

Naaseh ko jo chaahoon to abhii Thiik banaa doon
Par Khauf Khudaa kaa hai ke main kuchh nahiin kahataa
[Momin]

Tanz-o-taanaa-o-tohamat sab hunar hain naaseh ke
Aap se koii poochhe ham ne kyaa buraaii kii
[Ahmed Faraz]

[tanz = satire; taanaa = taunt; tohamat = allegation]

Najaat ho gaii naaseh se umr bhar ke liye
Usii ko bhej diyaa yaar kii Khabar ke liye
[Jalal]

Kiyaa karate ho naaseh tum naseehat raat din mujh ko
Use bhii ek din tum jaa ke samajhaate to kyaa hotaa
[Rangeen]

Hazrat-e-naaseh gar aayen deedaa-o-dil farsh-e-raah
Koii mujh ko ye to samajhaa do ki samajhaayenge kyaa
[Ghalib]

Ham haal kahe jaayenge suniye ki na suniye
Itanaa hii to yaan sohabat-e-naaseh kaa asar hai
[Momin]

Mizaaj apanaa nahiin haazir kahiin naaseh na aa nikale
Khudaa jaane wo kyaa bole hamaare moonh se kyaa nikale
[Unknown]

Naasehaa! Dil men tuu itanaa to samajh apane ki ham
Laakh naadaan sahii tujh se bhii naadaan honge
[Momin]

Jawaab hazrat-e-naaseh ko ham bhii kuchh dete
Jo guftagoo ke tareeqe se guftagoo karate
[Aziz Lucknawi]

Zabaan pe labbaik har nafas men zameen pe sajde hain har qadam par
Chalaa hoon yoon butkade ko naaseh ke jaise kaabe ko jaa rahaa hoon
[Jigar Moradabadi]

Khilaaf-e-masalehat main bhii samajhataa hoon magar naaseh
Wo aate hain to chehare par tahayyur aa hii jaataa hai
[Josh Malihabadi]

[Khilaaf-e-masalehat = against wisdom; tahayyur = change]

Tum hii insaaf se ai hazrat-e-naaseh kah do
Lutf in baaton men aataa hai ke un baaton men
[Daag Dehlvi]

SHARE
Previous articleMulaqat Urdu Poetry
Next articleNaqaab Urdu Poetry

Awaargi.com is your News, Entertainment, Urdu Poetry, Fashion, Health and Care website. We provide you with the latest breaking news and videos straight from the entertainment industry.

LEAVE A REPLY

Please enter your comment!
Please enter your name here

nineteen − nineteen =